އާދަމް ނަޞީރު އިބްރާހީމް

އަޅުގަނޑަކީ އާދައިގެ ދިވެއްސަކީމެވެ. އުނގެނުމާއި އުގަންނާދިނުމަށް ލޯބިކުރަމެވެ. މަދަރުސާ، ކޮލެޖު، ޔުނިވަރސިޓީތަކުގައި ކިޔަވައިދިނުމުގައި ފަންސަވީހަކަށް އަހަރު ހޭދަކުރެވިއްޖެއެވެ.

އަޅުގަނޑު ފޮތް އެކުލަވައިލަމެވެ. ނޫސް މަޖައްލާތަކަށް ލިޔަމެވެ. ޅެން ހަދަމެވެ. ވާހަކަލިޔަމެވެ. ތަމްސީލު ލިޔެ ކުޅުވަމެވެ. ޓީވީ ރޭޑިޔޯ ޕްރޮގްރާމު ލިޔެ ހުށަހަޅަމެވެ. ތަޤުރީރުކުރަމެވެ.

އޮފީސްތަކަށް ޚާއްޞަ ބަހުގެ ޕްރޮގްރާމުތައް ހިންގަމެވެ. ވާހަކަދެއްކުންތެރިކަމާއި ޅެންވެރިކަމުގެ ކޯސްތައް ފަރުމާކޮށް ކިޔަވައިދެއެވެ. މި ދާއިރާތަކުން މީހުން ތަމްރީނުކުރަމެވެ.

އަޅުގަނޑުގެ ޅެމާއި ލަވަ ޢަލީ ރަމީޒު، ޢަބްދުލްބާރީ، ޙުޒާމް، އިލްހާމު، މުޚްތާރު، މުޙަންމަދު ޢަބްދުލްޣަނީ (ތޭރަ), އިބްރާހީމް ޢަލީ (ކުޑައިއްބެ), އުނޫޝާ، ޝަލަބީ، ޙުސައިން ޢަލީ، ޠަލާޤު، ޢަބްދުއްރާފިޢު، މުމްތާޒު، ޢުމަރު ޒާހިރު، ޢަބްދުﷲ ރަޝީދު، ޒޫނާ، ޝިފާ، އަދި ވެސް އެތައް އެތައް ފަންނާނުންނެއް ކިޔާފައިވެއެވެ.

ދިވެހިރާއްޖޭގެ ޤައުމީ ދިފާޢީ ބާރަށް އަޅުގަނޑު ތައްޔާރުކޮށްދިން މިޔުޒިކީ ތަމްސީލު ދޮންބަންޑާރައިންގެ ޤައުމީ ޖިހާދު، މިނިވަން ފަންސާހުގެ ތީމު ލަވަ، ޖުމްހޫރީ ފަންސާހުގެ ތީމު ލަވަ، އަދި ރަމަޟާން މަހަށް ޚާއްޞަކޮށްގެން ތައްޔާރުކުރެވުނު ނަފްސު ހޭލައްވާލަދޭށޭ އަންނަނީ ރަމަޟާންކަރީމް މިއީ އަޅުގަނޑުގެ ޤައުމީ ދީނީ ޅެންތަކުގެ ތެރެއިން ވަރަށް ގިނައިން ދުރަށް ފޮނުވޭތީ އިވޭ ޅެންތަކެވެ.

އަޅުގަނޑުގެ ޙަޔާތާއި އަދަބީ މަސައްކަތާ ގުޅޭ އިތުރު ތަފުސީލު ދިވެހި ރާއްޖޭގެ އަޑުގެ ”ގުލްޒާރުގައި މަގޭ“ މި ޕްރޮގްރާމުގައި ގެނެސްދީފައިވާ ގޮތް ތިރީގައި މި ވަނީ އެވެ.

ތިބާގެ ޝައުޤުވެރިކަން ހުރި ނަމަ، ތިރީގައިވާ މީސްމީޑިޔާގެ ފާލަންތަކުން އަޅުގަނޑާ އިތުރަށް ގުޅުން ބަދަހިކުރެއްވުން އަޅުގަނޑު އެދެމެވެ. ނުހަނު އިޙްތިރާމާއެކުގައެވެ.